د افغانستان ملي دفاع وزارت د کابل ریشخور سیمه کې د یوه ښوونځي مخې ته د یوه ماین چاودنې د مخنیوي خبر ورکړی دی.
د دغه وزارت په اعلامیه کې راغلي چې مخالفو وسله والو نن سه شنبې سهار شپږ بجې په ریشخور سیمه کې د علیا لیسې مخې ته ریموټ کنټرول ماین ایښی و چې د ځانګړو ځواکونو د قول اردو د ګارنیزیون د منسوبینو له لوري له منځه وړل شوی دی.
دفاع وزارت وایي دا ماین د ښوونځي د زده کوونکو لپاره ځای پر ځای شو و.
دا په داسې حال کې دی چې پرون هم کابل کې د یوه ښوونځي مدیر د ښوونځي دروازې مخې ته د نامعلومو وسله والو له لوري ووژل شو.
