هند او چین هوکړه کړې چې د دواړو هېوادونو ترمنځ به مستقیمې الوتنې بیا پیل شي او د سوداګرۍ او پانګونې اړیکې به پراخې شي. دا پرېکړه نوي ډیلي ته د چین د بهرنیو چارو وزیر د دوه ورځني سفر پر مهال وشوه.
د هند د بهرنیو چارو وزارت په وینا، دواړه لوري به په درېیو ځانګړو لارو کې سرحدي سوداګري بیا پیل کړي او د ویزو بهیر به اسانه شي.
همداراز، د همالیا له پولې د ځواکونو د وتلو او د پولې د ټاکلو په اړه خبرې اترې هم روانې دي، چې د شخړو د کمېدو او اعتماد د زیاتېدو لپاره یو مهم ګام بلل کېږي.
