یو امریکایي چارواکي، چې د موضوع د حساسیت له امله یې نه غوښتل نوم یې افشا شي، رویټرز خبري آژانس ته ویلي چې د ایران پر اټومي تاسیساتو د امریکا د نننیو بریدونو پر مهال له B-2 ډول ستراتیژیکو بم غورځونکو الوتکو څخه کار اخیستل شوی دی.
یادې B-2 بم غورځونکې، چې د “سټیلت” ټکنالوژۍ لرونکې دي او کولی شي درانه بمونه ولېږدوي، د امریکا د هوايي ځواک له خورا پرمختللو او پټ عمل کوونکو الوتکو څخه شمېرل کېږي. دا الوتکې داسې ډیزاین شوې دي چې د دښمن د رادار سیسټمونو له کشف څخه ځان پټ وساتي.
تر دې وړاندې رویټرز راپور ورکړی و چې دغه بم غورځونکې الوتکې له امریکا څخه د سیمې پر لور حرکت کړی وې، خو دا لومړی ځل دی چې یوه لوړپوړي امریکایي سرچینه په څرګنده توګه د دغو الوتکو کارول تأییدوي.
تر اوسه د ایران له لوري د بریدونو په اړه رسمي غبرګون نه دی خپور شوی، خو د سیمې حالات ترینګلي بلل کېږي او نړیوال غبرګونونه هم تمه کېږي.
