تاسماگامبتوف: حضور گروه‌های هراس‌افگن درافغانستان یک مسئله بسیار جدی است

«ایمانقلی تاسماگامبتوف»، دبیرکل سازمان پیمان امنیت جمعی گفته‌است که طرح تقویت مرز تاجیکستان با افغانستان در هشتم قوس امسال تصویب می‌شود.
آقای تاسماگامبتوف دبیرکل این سازمان، درگفت‌وگو با «سی‌تی‌وی» بلاروس افزوده که هنوز شمار قابل توجهی از گروه‌های هراس‌افگن درافغانستان حضور دارند؛ واین «یک مسئله بسیار جدی» است.
او تصریح کرد: «وضعیت افغانستان برای آسیای میانه نگران‌کننده است. تصویب برنامه تقویت مرز تاجیکستان با افغانستان، به کشورهای عضو سازمان پیمان امنیت جمعی این امکان را می‌دهد که به‌گونه مشترک امنیت کشورهای آسیای میانه را تضمین کنند.»
ازسوی دیگر، امارت اسلامی تاکنون در این مورد چیزی نگفته؛ اما پیش از این حضور گروه‌های هراس‌افگن را درافغانستان رده کرده و گفته بود که امارت اسلامی به هیچ گروهی اجازه استفاده از خاک افغانستان را بر ضد دیگر کشورها نمی‌دهد.
امام علی رحمان، رییس‌جمهور تاجیکستان طرح ایجاد کمربند امنیتی در اطراف افغانستان را در جنوری سال ۲۰۲۲ مطرح کرده بود.
روسیه، بلاروس، ارمنستان، قزاقستان، قرغیزستان و تاجیکستان اعضای سازمان پیمان امنیت جمعی‌اند.
این سازمان‌ در سه سال گذشته بارها از اوضاع امنیتی افغانستان ابراز نگرانی کرده‌ و چندین رزمایش نظامی نیز در خاک تاجیکستان نزدیک به مرز افغانستان برگزار کرده‌است.