سفیر امریکا در اوزبیکستان اعلام کرده که بنا بر یک توافق جدید، ۴۶ چرخبال ارتش سابق افغانستان در اختیار حکومت اوزبیکستان باقی می‌ماند.
در همین‌حال، وزارت دفاع می‌گوید که هر نوع معامله در مورد چرخبال‌های افغانستان در اوزبیکستان غیرقابل قبول است.
از سوی‌هم، شماری از کارشناسان سیاسی می‌گویند که باید در دادگاه بین‌المللی در مورد چرخبال‌های افغانستان در اوزبیکستان تصمیم گرفته شود.
جاناتان هنیک، سفیر امریکا در اوزبیکستان اعلام کرد که امریکا و اوزبیکستان توافق کرده‌اند که ۴۶ هواپیمای نظامی که در ۱۵ اگست سال ۲۰۲۱ از سوی خلبان‌های افغان به این کشور انتقال داده شده بود، در اختیار حکومت اوزبیکستان باقی می‌ماند.
سفیر امریکا در اوزبیکستان افزده‌‌است: “این وسایل نقلیه هرگز متعلق به افغان‌ها نبوده‌است؛ بلکه متعلق به امریکا بوده‌است. ارتش افغانستان از آن‌ها استفاده کرده‌است؛ اما ما همیشه مالک آن‌ها بوده‌ایم. این وسایل نظامی در اوزبیکستان خواهند ماند و در این‌باره به‌گونه رسمی توافق شده‌است.“
درهمین‌حال، عنایت‌الله خوا رزمی، سخنگوی وزارت دفاع می‌گوید که هر نوع معامله در مورد چرخبال‌های افغانستان در اوزبیکستان غیرقابل قبول است.
وی از کشور اوزبیکستان خواست که با حسن همسایه داری در تسلیم دهی چرخبال‌های افغانستان همکاری کند.
مقام‌های اوزبیکستان در تاریخ ۱۵ اگست ۲۰۲۱ اعلام کرده‌اند که ۲۲ فروند چرخبال نظامی و ۲۴ چرخبال نیروهای مسلح افغانستان وارد حریم هوایی اوزبیکستان شده‌است.
در همین‌حال، شماری از کارشناسان مسایل سیاسی و نظامی در مورد عدم پس‌دهی چرخبال‌های افغانستان به این کشور چنین دیدگاه دارند.
همزمان با سقوط جمهوریت، شماری از خلبان‌های افغان با چرخبال‌های نظامی به اوزبیکستان فرار کردند.
در سه سال گذشته، اوزبیکستان و تاجیکستان در حال مذاکره با امریکا بودند تا مالکیت این تجهیزات نظامی را به دست آورند.
