د ترکیې د کرنې او ځنګلونو وزیر، ابراهیم یوماکلي، اعلان کړی چې د ایسکیشهر ولایت په ځنګلي سیمو کې د اور لګېدنې د مهارولو عملیاتو پر مهال لس تنه اور وژونکي خپل ژوند له لاسه ورکړی او ۱۴ تنه نور ټپیان شوي دي.
وزیر دا څرګندونې نن له خبریالانو سره د خبرو پر مهال وکړې او ویې ویل، “زموږ زړور اور وژونکي د خلکو، چاپېریال او طبیعت د ساتنې لپاره خپل ژوند قرباني کوي. موږ د دغو اتلانو له کورنیو سره ژوره خواخوږي لرو.”
د راپورونو له مخې، اور د سختو بادونو او وچې هوا له امله ژر خپور شوی او د کنټرول راوستلو هڅې لا هم روانې دي. د اور وژنې په عملیاتو کې الوتکې، هلیکوپترې او سلګونه کارکوونکي برخه لري.
د پېښې د دقیقو لاملونو معلومولو لپاره پلټنې روانې دي، او چارواکو له خلکو غوښتي چې د خوندیتوب مقرراتو ته جدي پاملرنه وکړي.
