دفتر رسانه‌ای والی بدخشان اعلام کرده که محمد ایوب خالد، والی بدخشان با هیأتی از سفارت جمهوری تاجیکستان مقیم افغانستان در بدخشان دیدار و گفت‌وگو کرده است.
در یک خبرنامه‌ای این دفتر آمده که در این دیدار طرف‌ها پیرامون تقویت و گسترش همکاری‌های دوجانبه در عرصه‌های اقتصادی، تجاری، فرهنگی، ترانزیتی و امنیت مرزهای مشترک بحث کردند.
براساس خبرنامه والی بدخشان در این دیدار بر اهمیت همکاری‌های مشترک میان دو کشور تأکید کرده و خواهان تقویت بیشتر روابط میان نهادهای مسوول شده است.
از سوی هم، هیأت سفارت تاجیکستان گفته که در راستای تقویت مناسبات و ایجاد اعتماد بیشتر میان افغانستان و تاجیکستان تلاش‌های لازم انجام خواهند داد.
این دیدار در حالی صورت می‌گیرد که بدخشان به‌عنوان یکی از ولایت‌های مرزی کشور، نقش مهمی در تعاملات دوجانبه میان افغانستان و تاجیکستان ایفا می‌کند و تقویت این روابط می تواند زمینه‌ساز همکاری‌های منطقه‌ای گسترده‌تری باشد.
