د هند مهاراشترا ایالت دیپولي ښار کې تیره میاشت پر یوې ۹۰ کلنې هندۍ ښځې جنسي تیری شوی و.
خو دغې میرمنې چې هویت یې تر اوسه د پولیسو له لوري پټ ساتل شوی، په دې هکله له حال ویلو ډډه کړې وه.
دا کیسه د تیرې جمعې په ورځې د جنسي تیري د دغې قرباني د ننګور له لوري پولیسو ته څرګنده شوه.
پر دغې ښځې د تیرې ډسمبر میاشتې په شلمه ورځ د یوه ۳۳ کلن کروندګر له لوري جنسي تیری شوی و.
خو هغې له دې ویرې چې تیری کوونکی به ورته زیان ورسوي، هیچاته خوله خلاصه نه کړای شوه.
د انډیا ټایمز د رپوټ پر اساس دا میرمن د جنسي تیري زغملو ترڅنګ د تیري کوونکی له لوري ډبول شوې هم ده.
رپوټ وایي چې هغې یوه ورځ د کور دروازه کې شیدې پلورونکي ته په تمه وه چې یو نا اشنا کس په دې پلمه چې د شیدې پلورنکي ځای ته یې بیایي، یوې کروندې ته لاره بدله کړه او هلته یې پرې تیری وکړ.
له دې پيښې شاوخوا شل ورځې وروسته یې د ورپيښې ناروغۍ له کبله اړه شوه چې نږدې بل کلي کې د خپل لیور کور ته لاړه شي، هغه ځای چې د هغې د ژوند دغه پټه ترخه خاطره پکې په ډاګه شوه.
د میرمنې زوی او ننګور چې په ممبی کې ژوند کوي، له پيښې تر خبریدو وورسته یې پولیسو ته خبر ورکړ.
تیری کوونکی د سیمې د خلکو له لوري نیول شوی او پولیسو ته سپارل شوی دی.
هند یو له هغو هیوادونو دی چې پر ښځو د تاوتریخوالي، په ځانګړي توګه د جنسي تیري زیاتې پيښې پکې کیږي.
