د اوبو چارو د تنظیم ملي اداره وایي وسله والو طالبانو پرون جمعه ماښام د کمال اوبو او برښنا بند باندې برید کړی او د دغه بند شپږ تنه ساتونکي یې وژلي او دوه نور یې ټپیان کړي دي.
طالبانو بند باندې برید رد کړی او ویلي یې دي چې دوی بند ته نږدې امنیتي پوستې باندې برید کړی دی.
کمال خان بند د نیمروز ولایت چهاربرجک ولسوالۍ کې د هلمند پر سیند موقعیت لري او تر اوسه یې د جوړیدو چارې نه دي پشپړې شوې.
کمال خان بند په تیرو لسو کلونو کې څو ځلې د وسله والو تر برید لاندې راغلی او ګڼ شمیر کسان پکې وژل شوي دي.
