تأکید چین و تاجیکستان بر تشکیل حکومت فراگیر در افغانستان

در ادامه درخواست‌های جهانی مبنی بر تشکیل حکومت فراگیر در افغانستان، رییسان جمهور چین و تاجیکستان در بیانیه‌ای مشترک پشتیبانی خود را از تشکیل حکومت فراگیر با حضور نماینده‌های تمامی گروه‌های قومی، مذهبی و سیاسی در افغانستان اعلام کردند. رسانه‌های چینی گزارش داده‌اند که رهبران دو کشور در این بیانیه، تأمین امنیت در افغانستان را به نفع تمام منطقه و جهان دانسته‌اند. این در حالی‌ست که ذبیح‌الله مجاهد سخن‌گوی امارت اسلامی در واکنش به درخواست رهبران تاجیکستان و پاکستان در مورد تشکیل حکومت فراگیر در افغانستان گفته بود که تشکیل حکومت فراگیر در افغانستان یک موضوع داخلی است. گفتنی‌ست که مقام‌های حکومت سرپرست همواره گفته‌اند که حکومت آنان همه‌شمول است و از تمام اقوام کشور نمایندگی می‌کند.