شهباز شریف، نخست‌وزیر پاکستان و امام‌علی رحمان، ریيس‌جمهور تاجیکستان در نشست امضای توافقانامه‌‌ای همکاری راهبردی در پایتخت تاجیکستان، خواهان ایجاد دولت فراگیر در افغانستان شده‌اند. وزارت خارجه پاکستان در خبر‌نامه‌ای به نقل از رهبران دو کشور نوشته‌است که رهبران دو کشور صلح و ثبات در افغانستان را یک نیاز اساسی برای کشورهای منطقه گفته‌اند. براساس خبرنامه، آنان در این راستا، داشتن یک حکومت فراگیر را برای افغانستان مهم دانسته‌اند. رهبران این دو کشورهم‌چنان در مورد گسترش تهدیدهای امنیتی از افغانستان ابراز نگرانی کرده و به همکاری دوشنبه و اسلام‌آباد در مبارزه با هراس‌افگنی تأکید کرده‌اند.
با آن‌که آنان تهدیدهای امنیتی از افغانستان را مشخص نکرده‌اند؛ اما پیش از این مقام‌های پاکستانی، افغانستان را متهم به پناه دادن هراس‌افگنان کرده و تاجیکستان نیز نگران نفوذ گروه‌های ضد امنیت از افغانستان به این کشور بوده‌است. ادعاهایی که همواره از سوی امارت اسلامی بی‌اساس پنداشته شده‌است.
گفته می‌شود در این دیدار، بخشی از گفت‌وگوهای سران دو کشور متمرکز بر اوضاع افغانستان بوده و هر دو طرف بر پیکار مشترک در مبارزه با هراس‌افگنی تاکید کرده‌اند.
تأکید تاجیکستان و پاکستان به تشکیل حکومت فراگیر در افغانستان
About the author
