تیرو ۲۴ ساعتونو کې ۲۳ سرتیري د طالبانو په بریدونو کې وژل شوي

په تیرو ۲۴ ساعتونو کې د هیواد په بیلابیلو برخو کې ۲۳ تنه افغان سرتیري د طالبانو په بریدونو کې وژل شوي دي.

دغه سرتیري په بغلان، تخار او زابل ولایتونو کې د وسله والو طالبانو په ډلیبزو بریدونو کې وژل شوي دي.

^{د افغانستان دفاع وزارت وایي په دې بریدونو کې طالبانو ته هم درانه تلفات ور اوښتي دي.}

^{طالبانو پرون شپه د تخار خواجه غار ولسوالۍ کې د سیمه ییزو پولیسو پر پوستې برید کړی چې په ترځ کې یې ۱۳ تنه سرتیري ووژل شول.}

^{د تخار د والي ویاند، جواد هجري د دې پيښې پخلی کړی او ویلي دي چې شپږ نور سرتیري په دغه برید کې ټپیان شوي دي.}

^{همداشان په بغلان او زابل ولایتونو کې هم د طالبانو بریدونو کې لږ تر لږه لس سرتیري وژل شوي دي.}

^{ویل کیږي افغان ځواکونه له تیرو پنځو اونیو راهیسې د تهاجمي عملیاتو د ترسره کولو اجازه نه لري.}

^{د افغانستان دفاع وزارت وایي دوی اوسمهال په فعاله دفاعي حال کې دي.}

^{طالبانو ته یو شمیر نږدې سرچینې د طالبان د بریدونو د ډیروالي علت د بندیانو د خوشې کولو ځنډیدل بولي.}

^{یو شمیر سیاسي او پوځي شنونکي وایي د افغان سیاسي مشرانو ترمنځ اختلافونو د افغان ځواکونو روحیه ور کمزورې کړې ده او دا د دې لامل شوي چې سرتیرو ته تلفات ور واوړي.}

^{دا بریدونه داسې حال کې کیږي چې د افغان حکومت او طالبانو ترمنځ د بندیانو خوشې کولو لپاره بحثونه روان دي.}

^{ټاکل شوې ده د طالبانو ۵۰۰۰ بندیان د افغانستان له زندانونو ازاد شي.}