گفت‌وگوی رییس پارلمان ایران با رییسان مجلس‌ کشورهای منطقه درباره افغانستان

براساس گزارش خبرگزاری «ایسنا» محمد باقرقالی‌باف رییس مجلس شورای ایران در سفری به تاجیکستان با شماری از رییسان مجلس کشورهای منطقه مشمول تاجیکستان درباره افغانستان گفت‌وگو کرده‌است.
سفر قالی‌باف به تاجیکستان به دعوت «رستم امام‌علی» و «محمدطاهر ذاکر زاده» رییسان مجلس‌های ملی و نمایندگان تاجیکستان انجام شده و هدف آن تحکیم روابط پارلمانی و تسهیل ارتقای روابط اقتصادی، فرهنگی و سیاسی میان دو کشور گفته شده‌است.
این گزارش افزوده که تأمین ثبات و امنیت در افغانستان، مبارزه با موادمخدر و قاچاق اسلحه از موضوع‌های مهم نیز در این گفت‌وگو‌ها بوده‌است.
سفر دو روزه رییس پارلمان ایران به منظور اشتراک در مراسم سی‌ومین سال‌گرد تصویب قانون اساسی تاجیکستان و اشتراک در یک نشست پارلمانی بین‌المللی در آن کشور انجام شده‌است.
قالی‌باف در این نشست، در باره‌ی ضرورت فعالیت بیش‌تر در سازمان‌های بین‌المللی از جمله اتحادیه میان‌ مجلس‌ها و سازمان‌های آسیایی و اسلامی نیز تأکید کرده‌است.
این نشست در تاجیکستان با حضور نزدیک به ۱۰ رییس مجلس از کشورهای منطقه و به دعوت رییسان دو مجلس تاجیکستان برگزار شده‌است.
پیش از این کشورهای منطقه مشمول تاجیکستان و ایران از حضور «داعش خراسان» در افغانستان ابراز نگرانی کرده بودند، چیزی که همواره از سوی امارت اسلامی رّد شده‌است.